તાજેતરમાં યુવાનોમાં સગાંસંબંધીને નજરઅંદાજ કરી મિત્રસાહેલીને મહત્ત્વ આપવાનો ટ્રેન્ડ વધી ગયો છે. હા સત્ય છે કે મિત્રતાનો સંબંધ અદ્ભુત હોય છે અને જે સમજદારીથી નિભાવવામાં આવે તો જીવન ખુશહાલ બની જય છે, પરંતુ દુખ એ વાતનું થાય છે કે વર્તમાન સમયમાં મોટાભાગે આસપાસના કેટલાક લોકોને જ મિત્ર બનાવી લેવાય છે અને માત્ર દેખાડા અને ટાઈમપાસ મિત્ર માટે સગાંસંબંધીને નજરઅંદાજ કરતા હોય છે અને તેમના પ્રત્યેની જવાબદારીથી પણ દૂર ભાગે છે. અવંતિકા તેના દીકરાની જન્મદિન પાર્ટીનું આમંત્રણ આપવા માટે સગાંસંબંધીનું લિસ્ટ તૈયાર કરી રહી હતી તો તે જેાઈને દીકરો પલાશ બોલ્યો, ‘‘અરે મમ્મી, આ આટલા સગાંસંબંધીનું લિસ્ટ કેમ તૈયાર કરી રહી છે? બધાને બોલાવીને શું કરીશ? હું આ વખતે મારો બર્થ-ડે મારા મિત્રો સાથે ઊજવીશ. મિત્રોને તો તું દર વર્ષે બોલાવે છે, આ વર્ષે પણ બોલાવજે, પણ તું સગાંસંબંધીને બોલાવવાની કેમ ના પાડે છે?’’ અવંતિકાએ આશ્ચર્યથી પૂછ્યું. પલાશે કહ્યું, ‘‘મમ્મી, સગાંસંબંધી તો તમારા છે ને. તેમની વચ્ચે હું કંટાળી જાઉં છું. આ વખતે મારો બર્થ-ડે હું માત્ર મારા મિત્રો સાથે કોઈ મોલ કે રેસ્ટોરન્ટમાં જ સેલિબ્રેટ કરીશ.
મિત્ર મારા અને સગાંસંબંધી તારા : પલાશના મોઢેથી આ વાત સાંભળીને અવંતિકા ચુપ થઈ ગઈ. ‘સગાંસંબંધી તો તમારા છે’ આ વાક્ય ઘણા સમય સુધી તેના કાનમાં ગુંજતું રહ્યું અને તે વિચારતી રહી કે શું હવે બાળકોની દુનિયા માત્ર તેના મિત્રો સુધી સીમિત રહી જશે? બાળકોને કાકી, ફોઈ, માસી, ભાભી જેવા સંબંધથી કોઈ લેવાદેવા નથી? હવે તે માત્ર અમારા સગાંસંબંધી છે? દિલ્લીની રહેવાસી સુમને જ્યારે તેની ભત્રીજીને, જે દિલ્લીમાં જ એક કંપનીમાં જેાબ કરે છે તેને પૂછ્યું કે તે ન્યૂ યરમાં તેના ઘરે બનારસ જઈ રહી છે કે નહીં? તો તેણે જવાબ આપ્યો કે તે નથી જઈ રહી, કારણ કે બીજા મહિને તેની એક સાહેલીનો જન્મદિન છે અને આ વખતે તે તમામ સાહેલી તેનો જન્મદિન ઊજવવા સિમલા જવાની છે. તેથી તેણે ન્યૂ યરમાં રજા લીધી તો પછી સાહેલીના જન્મદિનમાં જવા માટે તેને રજા નહીં મળે. તેથી તેણે ન્યૂ યરમાં ઘરે જવાનો વિચાર માંડી વાળ્યો, પણ તેણે કંઈ ના કહ્યું, તેની સામે ભાઈભાભીનો ચહેરો આવ્યો કે તે કેટલા ઉત્સુકતાથી તહેવારમાં દીકરીના ઘરે આવવાની રાહ જેાતા હોય છે, પણ તેના ન આવવાના સમાચાર સાંભળીને તે કેટલા ઉદાસ થશે
